Қирғизистонда россиялик сиёсий фаол Алёна Крилова қўлга олинди. Sota хабарига кўра, Крилова 4 июнь куни Бишкекда қўлга олинган, бироқ бу ҳақда эндигина маълум қилинган.
Крилова “Инсон ҳуқуқлари учун” Россия ҳаракатининг собиқ матбуот котиби. У Россия ҳукумати томонидан экстремистик деб тан олинган “Сўл қаршилик” ҳаракатида қатнашган. Россияда Крилова ва ҳаракатнинг яна беш нафар аъзосига қарши экстремистик жамият яратиш бўйича жиноий иш очилди.
Крилова иштирок этганликда айбланаётган “Сўл қаршилик” ҳаракатининг экстремистик ҳаракатларининг моҳияти “ҳокимиятни обрўсизлантириш ва полиция билан тўқнашувларни қўзғатишга қаратилган митинглар, юришлар ва пикетлар” эди.
Алёна Крилова Россияга экстрадиция қилиш мақсадида ҳибсга олинган. Айни пайтда у Қирғизистондами ёки Россия томонига ўтказилганми, ҳозирча номаълум.
Бу июнь ойида Қирғизистонда россиялик сиёсий муҳожирларнинг ҳибсга олиниши билан боғлиқ учинчи ҳолатдир. 6 июнь куни ҳарбий рўйхатга олиш бўлимига ўт қўйишда айбланаётган урушга қарши фаол Алексей Рожков экстрадиция қилингани ҳақида маълум бўлди. 9 июнь куни Бишкекда “Сўл блок” ҳаракати фаоли Лев Скорякин қўлга олинди.
